Höfuðborgarvæðingin

Nú ætlar sjálfur heilbrigðisráðherra að heiðra Austfirðinga með nærveru sinni á morgun. Eftir að Austfirðingar hafa óskað eftir samtölum og fundum með heilbrigðisráðherra mánuð eftir mánuð er loksins komið að því.

Loforð um sjúkrahúsbyggingar og bætta þjónustu í þessum fjórðungi hafa ekki verið efnd, þvert á móti liggur fyrir niðurskurður hjá Heilbrigðisstofnun Austurlands, samkvæmt ákvörðun ráðherra. Þegar fólksfjölgun hefur aldrei verið meiri í fjórðungnum, er köttað niður. Þetta er athyglisvert. Hvernig dettur stjórnvöldum í hug að skella inn í okkar samfélag þvílíku skrímsli eins og álverið er án þess að bæta þjónustu? Þetta er óskiljanlegt. Auknum skatttekjum á svæðinu ættu að fylgja aukin útgjöld. ENN NEI segir ráðherra - þið skuluð leita til höfuðborgarinnar í sem flestum málum. Þetta er höfuðborgarvæðingin sem staðið hefur yfir í 50 ár og ekkert lát virðist vera þar á.

Ég er þeirrar skoðunar að taka eigi eins og 25% af fjármunum ætluðum til uppbyggingar á spítölum í Reykjavík og nýta þá til uppbyggingar á heilbrigðisþjónust á Vestfjörðum, Norðurlandi og Austurlandi - frekar en að draga úr þjónustu þar og gera svæðin óbyggilegri heldur en áður.

Ég fer fram á að Guðni Ágústsson leyfi Gulla að smakka Framsóknargrautinn áður en hann flýgur af stað austur. Ef það verður þá fært.

Athugasemdir

[Birkir Viðarsson (IP-tala skráð) 5.12.2007 kl. 16:41]

Einhverntíman var talað um byggðarstefnu. Svo var mér sagt að hún væri ekki til. Ég keypti það alveg enda fór ekkert fyrir henni... hún sást aldrei. En svo áttaði ég mig á því að í alla þessa áratugi var verið að tala um Höfuðborgarbyggðarstefnu. Þá fór þetta að koma heim og saman. Þá skildi ég allt í botn.

Annars ætlaði ég að flytja heim aftur en hætti við. Augu mín beinast frekar að Seyðis eða Héraði.